Нафтен танкер под знамето на Либерија се запали во близина на рускиот црноморски град Сочи, откако, според руските власти, бил нападнат со беспилотно поморско пловило. Засега нема независна потврда дека зад нападот стои Украина.
Станува збор за танкерот „Aframax Rio“, на кој по нападот избувнал силен пожар, а над морето се издигнал густ црн чад што бил видлив и од брегот.
Руското Министерство за транспорт соопшти дека сите 23 членови на екипажот, кои се индиски државјани, биле успешно евакуирани и дека, според првичните информации, нема повредени.
Пожарот во еден момент бил толку силен што спасувачките екипи не можеле веднаш да му пристапат на танкерот.
На социјалните мрежи се појавија снимки на кои се гледаат големи портокалови пламени јазици и огромен столб црн чад над Црното Море.
Поради инцидентот, локалните власти го ограничиле пристапот до делови од крајбрежјето и затвориле плажи во областа околу Сочи и Сириус.
Украина претходно го ставила „Aframax Rio“ на својата листа на санкционирани бродови, поврзувајќи го со таканаречената руска „флота во сенка“, преку која, според Киев, Москва го одржува извозот на нафта и покрај западните санкции.
Инцидентот се случува во период на засилени напади и тензии во Црното Море, каде во последните години повеќепати беа цел на напади трговски бродови, пристаништа и енергетска инфраструктура.
Иако повеќе медиуми нападот го поврзуваат со Украина, во моментот на објавување не е независно потврдено кој го извршил нападот врз танкерот.
Видео:
