Најмалку 27 лица загинаа во голем пожар што избувна во бар во Тајланд, откако десетици посетители останале заробени во објектот. Според локалните медиуми, најголем дел од жртвите биле пронајдени во тоалетите, каде што се засолниле во обид да се спасат од пламените јазици и густиот чад.
Пожарот избувнал во популарниот локал „Ронг Бир На Лат Прао“, сместен во областа Чатучак во Бангкок. Противпожарните служби добиле повик околу 23:57 часот по локално време, а по пристигнувањето затекнале објект кој веќе бил целосно зафатен од огнот.
Во првите моменти спасувачите пронашле едно лице со тешки изгореници, но набргу било утврдено дека голем број посетители останале заробени во внатрешноста.
Според првичните информации, многумина во паника се обиделе да се сокријат во тоалетите, надевајќи се дека таму ќе бидат безбедни. За жал, токму таму биле пронајдени повеќето од жртвите.
Десетици повредени се пренесени во околните болници, каде што им е укажана медицинска помош.
Фотографиите и снимките од местото на трагедијата покажуваат густ црн чад што се издигал од барот, додека пламенот за кратко време ја зафатил целата зграда. На видеата се гледаат и лица кои лежат пред локалот, додека медицинските екипи се обидуваат да ги реанимираат.
Во гаснењето на пожарот учествувале пожарникари од неколку противпожарни единици, кои интервенирале со три водени млаза. Огнот бил ставен под контрола по околу 35 минути, по што започнала детална потрага по евентуални преживеани.
Надлежните органи започнаа истрага за да ги утврдат причините за избувнувањето на пожарот. Засега не е соопштено што ја предизвикало трагедијата.
