Американската Федерална администрација за воздухопловство (ФАА) најави дека од утре ќе го намали воздушниот сообраќај за 10% на 40 главни аеродроми поради недостиг на персонал предизвикан од тековното затворање на владата.
Намалувањето ќе се воведува постепено: домашните летови ќе бидат намалени за 4% утре, 5% в сабота и 6% в недела, пред да достигнат 10% следната недела. Погодените аеродроми вклучуваат големи центри како Бостон Логан, Њујорк Ла Гвардија, Лос Анџелес и Далас/Форт Ворт, а официјалниот список ќе биде објавен денеска.
Администраторот на ФАА, Брајан Бедфорд, изјави дека намалувањето е неопходно за да се намали товарот врз контролорите на воздушниот сообраќај, кои веќе работат без плата. Министерот за транспорт, Шон Дафи, истакна дека мерките се воведени за да се зачува безбедноста на патниците и персоналот.
Минатиот викенд повеќе од 10.000 летови беа одложени, а околу 11.000 откажани. Американ ерлајнс најави дека денеска ќе работи според редовниот распоред, но ќе ги следи информациите од ФАА за летовите кои ќе бидат засегнати од утре.
