Нови тензии се појавија во источниот дел на Медитеранот откако остатоци од морнарички дрон беа пронајдени во близина на островот Лефкада, што веднаш предизвика реакција од грчките власти.
Министерот за надворешни работи на Грција порача дека земјата нема да дозволи проширување на воениот конфликт од Украина кон јужните европски мориња, нагласувајќи дека Медитеранот мора да остане зона на мир и безбедност.
Според првичните сомнежи на властите, станува збор за украински морнарички дрон, кој наводно бил насочен кон руски брод во поширокиот регион. Сепак, истрагата сè уште не е завршена, а засега нема официјална потврда за неговото потекло.
Инцидентот веднаш беше споделен со сојузниците во НАТО и Европската Унија, бидејќи постои загриженост дека конфликтот од Црното Море може да се прошири кон Медитеранот, што би имало сериозни безбедносни последици за целиот регион.
Атина предупреди и на потенцијални економски ризици, особено за комерцијалниот поморски сообраќај, бидејќи низ овие води секојдневно минуваат голем број танкери и товарни бродови. Секоја ескалација, велат властите, може да има и еколошки последици доколку дојде до инциденти на море.
Во меѓувреме, украинската страна ги негира наводите за поврзаност со дронот, додека истрагата продолжува. Ситуацијата дополнително ја зголемува загриженоста дека војната во Украина би можела да добие ново, пошироко географско влијание.
