Израелскиот министер за национална безбедност, Итамар Бен-Гвир, во четврток ги засили контроверзните ставови со јасен повик за целосна окупација на Појасот Газа. Тој инсистира дека Израел не смее да запре ниту за момент, бара прекин на хуманитарната помош и поттикнување миграција од Газа.
Овој став доаѓа во критичен период кога се одвиваат преговори за евентуален прекин на огнот и размена на затвореници помеѓу Израел и Хамас. Бен-Гвир ја оцени идејата за договор како „ужасна грешка“ и ја исклучи можноста за делумни компромиси.
И покрај речиси двегодишната војна, Израел сè уште не ги постигнал целите – ослободување на заложниците и уништување на воениот потенцијал на Хамас. Според проценки, во Газа остануваат околу 50 заложници, од кои 20 се сеуште живи, а над 10.400 палестински затвореници се во израелски затвори, со извештаи за сериозни неправилности и злоупотреби.
Во јавно обраќање, Бен-Гвир го отфрли предложениот договор за прекин на огнот, тврдејќи дека е неодговорен, и ги повика своите колеги од крајната десница да го блокираат секој таков обид. Тој го гледа ова како историска шанса за „вистинска победа“ која ќе го собори Хамас и ќе предизвика масовна миграција на Палестинците.
Оваа позиција се коси со напорите на медијаторите и дел од израелската влада кои работат на преговори, а Хамас веќе изрази подготвеност за размена на заложници и прекин на огнот. Сепак, премиерот Нетанјаху инсистира на ограничени договори, за да ја продолжи војната и да ја задржи својата политичка моќ.
Додека САД најавуваат поддршка за 60-дневен прекин на огнот, израелската војска продолжува со жестоките операции во Газа, каде според официјални извештаи, од почетокот на војната во октомври 2023, загинаа над 57.000 Палестинци, главно цивили.
Меѓународниот кривичен суд веќе издаде наредби за апсење на Нетанјаху и други израелски функционери за воени злосторства, а Израел е под обвиненија и за геноцид пред Меѓународниот суд на правдата поради своите дејствија во Газа.
