Соединетите Американски Држави ги информирале своите сојузници дека планираат постепено да го намалат военото присуство во Европа, особено во рамките на НАТО.
Според информации објавени од Политико, станува збор за намалување на стратешки бомбардери, борбени авиони, беспилотни летала, подморници и воени бродови кои моментално се наменети за поддршка на Алијансата на европскиот континент.
Оваа порака била пренесена од советникот на Пентагон, Александар Велез-Грин, за време на затворен состанок со директорите за политика во НАТО. Според дипломатски извори, деталите за планот сè уште не се целосно утврдени и не е прецизирана временската рамка за евентуалното повлекување.
Истовремено, Вашингтон продолжува да врши притисок врз европските членки да преземат поголема одговорност за сопствената одбрана и безбедност. Сепак, било нагласено дека нема да има промени во американската политика за нуклеарно одвраќање, што останува клучен елемент на безбедносната стратегија.
Овие најави може да означат значајна промена во односите меѓу САД и европските сојузници, како и во идниот развој на безбедносната архитектура на континентот.
