Пожар избувна во нуклеарната централа „Барака“ во Обединетите Арапски Емирати по напад со беспилотно летало, соопштија официјални претставници во Абу Даби, додека регионалните тензии продолжуваат да се зголемуваат.
Според властите, дронот погодил електричен генератор надвор од внатрешниот безбедносен периметар на централата. Инцидентот предизвикал пожар, но нема пријавени повредени, а нивото на зрачење останало нормално, тврдат надлежните служби.
Канцеларијата за медиуми на Абу Даби соопшти дека се спроведува истрага за потеклото на нападот, додека официјалните лица најавуваат дека ОАЕ „имаат право да одговорат“ на вакви, како што ги нарекоа, „терористички напади“.
Во меѓувреме, Министерството за одбрана на ОАЕ информираше дека се пресретнати и уништени уште два дрона, кои наводно биле лансирани од западната граница, без дополнителни детали за изворот.
Меѓународната агенција за атомска енергија (МААЕ) потврди дека еден од реакторските блокови бил префрлен на резервно напојување преку дизел генератори за итни случаи и повика на максимална воена воздржаност околу нуклеарни постројки.
Инцидентот доаѓа во период на засилени регионални конфликти, при што се зголемува загриженоста за безбедноста на енергетската инфраструктура во Персискиот Залив.
