Ливерпул го донесе првото засилување по желба на Слот – пристигнува Жереми Фримпонг за 35 милиони евра
Актуелниот шампион на Англија, Ливерпул, веќе го започна летниот преоден рок со силен потег – клубот ја активираше откупната клаузула вредна 35 милиони евра за Жереми Фримпонг, бекот на Баер Леверкузен.
Новото засилување е и првото исполнето барање на новиот менаџер Арне Слот, кој по заминувањето на Трент Александер-Арнолд, инсистираше на квалитетна замена на десната бековска позиција. Раководството на „црвените“ реагираше експресно и го договори трансферот на 23-годишниот Холанѓанец.
Фримпонг е познат по својата брзина и офанзивна игра, а освен што може да покрие дефанзивни задачи, често се вклучува и во нападот, што го прави идеален играч за фудбалската филозофија на Слот. Во сезоната што измина, тој одигра 48 натпревари за Леверкузен, при што постигна пет голови и запиша 12 асистенции – бројки кои потврдуваат дека Ливерпул добива повеќенаменски фудбалер со сериозен потенцијал.
Фримпонг ќе биде значаен адут во новата ера на „Енфилд“, каде Слот гради тим способен да ја задржи доминацијата и на домашната и на европската сцена.
