По повеќе од една деценија мистерија и молк, во јавноста се појавуваат информации кои повторно ја разгоруваат надежта за легендата на Формула 1 – Михаел Шумахер. Од тешката скијачка несреќа во декември 2013 година, неговата здравствена состојба беше строго чувана тајна, а семејството ретко споделуваше детали.
Иако јавноста очекуваше повеќе откритија преку документарецот на Нетфликс, конкретни медицински информации изостанаа. Сепак, најновите наводи што ги објавија странски медиуми носат значително пооптимистичка слика.
Според извор близок до семејството, по долги години рехабилитација и постојана медицинска нега, Шумахер наводно повеќе не е целосно неподвижен. Се тврди дека може да седи самостојно, па дури и да воспостави ограничена вербална комуникација. Иако сè уште не може да се движи без помош, постои напредок кој претходно не беше познат за јавноста.
Легендарниот возач, наводно, живее повлечено помеѓу Швајцарија и Мајорка, во строго чуван имот со високо ниво на безбедност. За него 24 часа дневно се грижи медицински тим, а пристап имаат само најблиските.
Во меѓувреме, се негираат и гласините дека Шумахер присуствувал на семејни прослави, вклучително и свадбата на неговата ќерка.
Иако официјална потврда нема, овие информации повторно ја будат надежта кај фановите ширум светот дека состојбата на седумкратниот светски шампион полека се подобрува.
