Арсен Венгер, директор за глобален развој на фудбалот во ФИФА, јавно се дистанцираше од контроверзниот план на Џани Инфантино за продажба на дел од комерцијалните права на Светското првенство на приватни инвеститори.
Во соопштение, поранешниот менаџер на Арсенал истакна дека повлекувањето на проектот било „апсолутно неопходно“, нагласувајќи дека ФИФА мора да остане независна организација која работи во интерес на фудбалот, со транспарентност и интегритет.
Венгер откри дека воопшто не бил вклучен во подготовката на проектот и дека за него дознал дури кога информациите се појавиле во медиумите.
Спорниот план предвидуваше формирање на компанијата FIFA Forward Enterprise (FFE), преку која требаше да се продаде 20-процентен удел на приватни инвеститори. Иницијативата наиде на силен отпор од повеќе фудбалски организации, по што беше повлечена.
Во меѓувреме, сè повеќе европски федерации ја повлекуваат поддршката за Инфантино. Англиската и Велшката фудбалска асоцијација веќе го известиле раководството на ФИФА за промената на својот став, додека УЕФА претходно соопшти дека ја изгубила довербата во актуелниот претседател на светската фудбалска организација.
Дополнителен притисок доаѓа и од Европската клупска асоцијација, која изразила загриженост дека проектот можел да влијае врз идните планови за организацијата и комерцијалните права на Светското клупско првенство.
