Француската фудбалска ѕвезда Килијан Мбапе се најде во центарот на голем меѓународен скандал откако негова изјава за фотомонтажа со поранешниот кинески лидер Мао Це Тунг предизвика жестоки реакции во Кина.
Според кинескиот портал „The Paper“, државната телевизија CCTV ги прекинала преносите на шпанската Ла Лига, а од програмата биле отстранети и рекламите со ликот на фудбалерот на Реал Мадрид.
Засега не е познато колку ќе трае суспензијата. Одлуката се однесува на државната телевизија, додека дигиталната платформа „Migu“ поседува посебни права за емитување на натпреварите.
Што кажал Мбапе?
Контроверзијата започнала кога на социјалните мрежи се проширила снимка на која Мбапе зборува за смешните фотомонтажи со неговиот лик.
На прашањето која му е најинтересна, фудбалерот посочил фотографија на која неговото лице е поставено на телото на човек за кого сметал дека е кинески диктатор.
Станувало збор за Мао Це Тунг, основачот на Народна Република Кина, кој и денес има значајно место во официјалниот кинески политички наратив.
Три големи компании ја прекинале соработката
Според објавените информации, кинеските компании Dongpeng, Mengniu и Milkground соопштиле дека ја прекинуваат соработката со Мбапе.
Компаниите оцениле дека неговото однесување ги навредува националните чувства на кинескиот народ.
Случајот предизвикал реакција и од кинеското Министерство за надворешни работи.
Портпаролот Гуо Џиакун изјавил дека постапките и зборовите што ги навредуваат чувствата на кинескиот народ ќе наидат на противење во кинеското општество.
На социјалната мрежа „Weibo“ започнале да се шират и повици за бојкот на францускиот фудбалер.
Она што започнало како шега на Мбапе прераснало во сериозна маркетиншка контроверзија, со последици за неговите спонзорски договори и телевизиското емитување на шпанскиот фудбал во Кина.
