Општина Центар започнува нова иницијатива наменета за најмладите граѓани, преку која децата ќе имаат можност да уживаат во филмски проекции, дружење и едукативна забава на отворено.
Како што информира градоначалникот Горан Герасимовски, проектот „Патувачко кино“ нуди поинакво културно и образовно доживување за децата. За потребите на проектот е подготвен специјален македонски детски филм составен од повеќе кратки приказни со поучна содржина.
Преку филмот, најмладите ќе учат за важни животни вредности како што се почитта, другарството, културата на однесување и секојдневните навики кои можат да направат голема разлика во општеството.
Проекциите ќе се организираат на повеќе локации низ општина Центар, а за сите присутни деца ќе бидат обезбедени бесплатни пуканки и сокче.
Првата проекција во рамки на „Патувачко кино“ е закажана за вторник во паркот во Капиштец, каде најмладите ќе можат да уживаат во филмска вечер под отворено небо.
