Паднатите дрвја што останаа зад себе по силното невреме и ветерот што го зафати Скопје нема едноставно да бидат отстранети и фрлени како отпад. Градот најави дека здравите стебла и трупци ќе добијат нова намена, со што вредниот природен материјал ќе биде повторно искористен наместо да заврши на депонија.
Од Град Скопје информираат дека дел од собраниото дрво ќе се употреби за изработка на реквизити за детски игралишта и моторички паркови, како и за урбана опрема. Дел од материјалот ќе биде искористен и за огрев, кој ќе биде наменет за социјално ранливи семејства.
Од градските власти посочуваат дека дрвото претставува вреден ресурс и дека материјалите кои можат повторно да се употребат треба внимателно и стручно да се обработат, со цел да бидат безбедни и да имаат што подолг рок на употреба.
„Дел од собраните материјали ќе биде наменет за изработка на моторички реквизити за деца, со цел да се создадат подобри услови за нивна игра, развој и физичка активност. Останатиот дел ќе биде наменет за помош на социјално загрозени семејства, во соработка со Црвениот крст и „Св. Спас“, велат од Град Скопје.
Идејата за повторна употреба на паднатите дрвја беше покрената од МЕЛЕЕМ, предводен од архитектката Сара Симоска. Иницијативата е инспирирана од практики кои се применуваат во повеќе светски метрополи, особено во скандинавските земји, каде дрвото од паднати или отстранети стебла се користи како природен материјал за различни јавни намени.
Архитектката Симоска преку социјалните мрежи упати апел паднатите дрвја да не се третираат само како отпад, туку да се искористат за создавање нови содржини во градот. Особено внимание е посветено на можноста од природното дрво да се изработуваат елементи за детски игралишта, каде децата би можеле да имаат поинакво искуство со природните материјали и да развиваат тактилни и моторички способности.
Од Град Скопје велат дека ја прифатиле иницијативата и дека се отворени за предлози кои можат да придонесат за подобрување на јавниот простор.
„Важно е да нагласиме дека ние како институција сме секогаш отворени за нови идеи и иницијативи, затоа прифатливи и добредојдени се сите добронамерни предлози, како и на МЕЛЕЕМ“, одговориле од градот.
Од паднатите стебла ќе се создава нов моторички парк на Водно
Еден од најзначајните планови е дел од здравите стебла да бидат искористени за создавање нов моторички парк на Водно. Наместо материјалот да биде отстранет без дополнителна употреба, тој ќе стане дел од простор наменет за физичка активност и престој во природа.
Според најавите, во паркот ќе има природни препреки и различни моторички реквизити преку кои децата и младите ќе можат да ја подобруваат рамнотежата, координацијата, агилноста и прецизноста.
Просторот нема да биде наменет исклучиво за деца. Од Град Скопје најавуваат дека ќе може да го користат и младите и возрасните за рекреација, движење, дружење и поминување повеќе време во природа.
Градоначалникот Орце Ѓорѓиевски најави дека здравите стебла кои паднале за време на невремето ќе добијат нова функција, наместо да се третираат како обичен отпад.
Од градот додаваат дека проектот ќе се реализира со сопствени ресурси и стручни кадри, со цел истовремено да се искористи материјалот што веќе постои и да се создадат нови и корисни јавни содржини.
По невремето најавена и голема есенска акција за пошумување
Покрај повторната употреба на паднатите дрвја, Град Скопје најавува и дополнителни активности за надоместување на штетата предизвикана од јулското невреме.
На местата каде што паднале или биле отстранети оштетени дрвја веќе се засадуваат нови садници, а во втората половина на септември е најавена голема есенска акција за пошумување.
„На местото на паднатите дрвја се засадуваат нови садници, а во втората половина на месец септември ќе започнеме голема есенска акција за пошумување на нашиот град“, порача градоначалникот Ѓорѓиевски.
На овој начин, планот е штетата предизвикана од невремето постепено да се надоместува со нови садници, додека дрвјата кои веќе паднале и се соодветни за употреба ќе добијат нова практична функција.
Големото невреме што го зафати Скопје предизвика значителни проблеми низ градот. Силниот ветер оштети покриви и други градежни елементи, а десетина граѓани побараа медицинска помош. За среќа, во невремето немаше загинати.
Особено погодени беа зелените површини, меѓу кои и Градскиот парк. Според досегашните проценки, силниот ветер соборил околу стотина дрвја на различни локации низ Скопје.
Иако конечните податоци за вкупната материјална штета сè уште не се целосно достапни, градските власти сега најавуваат дека дел од последиците од невремето ќе се претвори во нешто корисно за граѓаните – од паднатите стебла да се создадат нови простори за игра, рекреација и престој во природа, а преку есенското пошумување да се започне и обновување на зеленилото што беше уништено.
