Меган Маркл повторно се најде во центарот на јавноста, откако на социјалните мрежи и во дел од медиумите се појавија сомнежи дека користела вештачка интелигенција за подготовка на својот говор на настан во Женева.
Војвотката од Сасекс говореше на собир посветен на технологијата, безбедноста на децата и опасностите од интернетот, но наместо пораките што ги испрати, вниманието брзо се префрли на начинот на кој бил составен говорот.
На настанот, кој бил дел од Светско здравствено собрание, Маркл се појавила пред публика со порака „Ниедно изгубено дете поради социјалните медиуми“, а на сцената бил откриен и „Споменикот на изгубениот екран“.
Според пишувањата на порталот RadarOnline, дел од критичарите анализирале сегменти од говорот преку алатки за препознавање текст генериран со вештачка интелигенција. Тие тврдат дека формулациите звучеле „невообичаено“, „повторувачки“ и „ритмички структурирано“, што, според нив, наликувало на текст создаден со AI-системи.
Во говорот, Меган Маркл предупредила дека децата денес растат под влијание на „безмилосни алгоритми“, „експлоатација на вниманието“ и „континуирана изложеност на штетна содржина“. Таа истакнала и дека вештачката интелигенција дополнително ги засилува опасностите со кои се соочуваат младите на интернет.
На својот Instagram профил, Маркл објави фотографии од настанот со опис „Светско здравствено собрание, Женева, Швајцарија, 2026 година“, а ја означи и Светска здравствена организација.
Од комуникациската индустрија, пак, пристигнаа и поумерени реакции. Дел од експертите посочуваат дека говорите за големи јавни настани речиси секогаш се подготвуваат со помош на тимови, консултанти, истражувачи и современи дигитални алатки, вклучувајќи и AI-системи за обработка на текст.
Други коментатори ја нарекоа целата реакција иронична, бидејќи критиките се појавиле токму по говор во кој Маркл предупредувала на потенцијалните ризици од вештачката интелигенција и социјалните мрежи.
И покрај шпекулациите, досега не е објавен никаков доказ дека говорот навистина бил напишан од вештачка интелигенција. Случајот засега останува на ниво на сомнежи и онлајн дебати.
Во последните години, Принц Хари и Меган Маркл преку нивната фондација Archewell Foundation активно работат на теми поврзани со безбедноста на интернет, заштитата на децата и влијанието на дигиталните платформи врз младите.
