Градоначалникот на општина Битола, Тони Коњановски, денес имаше средба со претседавачот на Општинскиот совет за превенција од детско престапништво, м-р Жанета Ристевска, и членовите на ова тело, на која беа разгледани Програмата на Советот и планираните активности за 2025 година.
Средбата се фокусираше на важноста од континуирано делување за проценка на состојбата со малолетничко престапништво на територијата на општината и подигнување на свеста во заедницата за оваа проблематика. Акцентирано беше и на воспоставување координирана соработка со институциите кои го третираат овој проблем на национално, регионално и општинско ниво.
Градоначалникот Коњановски го поздрави и успешниот уметнички настан што се одржа синоќа во Офицерскиот дом, организиран од Советот за превенција од детско престапништво Битола и Центарот за поддршка на деца и лица со попреченост „Сложувалка срце“. Овој настан им овозможи на учениците од основните училишта „Св. Кирил и Методиј“, „Коле Канински“ и ресурсниот центар „Кочо Рацин“ да ги оживеат познатите уметнички дела во 3Д перформанс, покажувајќи огромен талент и креативност.
Во своето обраќање, м-р Жанета Ристевска истакна дека настанот беше резултат на трудот и мотивацијата на сите учесници, со цел да се стимулираат децата да го искористат своето слободно време за градење креативни и трајни уметнички дела. Таа нагласи дека ваквите активности играат клучна улога во превенцијата од детското престапништво, поттикнувајќи ги децата да го насочат својот потенцијал на позитивен начин.
Градоначалникот Коњановски им честита на сите кои беа дел од организирањето на овој значаен настан и нагласи дека Општина Битола продолжува да ја поддржува оваа важна иницијатива, која има значаен придонес за развојот на младите и за нивната интеграција во општеството.
