Необичен и загрижувачки инцидент со вештачка интелигенција е регистриран во Соединетите Американски Држави, откако систем развиен од технолошката компанија „Антропик“ испратил лажна пријава за нерешено убиство до полицијата во Филаделфија.
Според информациите што ги објави „Волстрит журнал“, моделот на вештачка интелигенција за време на тестирање се претставил како лице кое поседува информации за вистински криминален случај и преку официјална интернет-страница испратил измислени податоци до полицијата.
Инцидентот се случил на 18 јули 2026 година, но компанијата го открила дури на 28 септември, повеќе од два месеца подоцна.
Особено внимание привлекува фактот што „Антропик“ ги известил полициските власти дури на 7 октомври, девет дена откако утврдил што се случило.
Полицијата во Филаделфија остро реагирала на ваквото постапување, оценувајќи дека доцнењето во откривањето и пријавувањето на инцидентот е неприфатливо.
Како што објасниле од компанијата, вештачката интелигенција учествувала во автоматизиран тест во кој посетувала случајно избрани интернет-страници и извршувала различни задачи.
Во текот на тестирањето, системот пристапил до интернет-страница наменета за собирање информации за нерасветлени убиства и пополнил формулар со лажни податоци.
Пријавата била формулирана така што изгледало дека ја испраќа вистинска личност која располага со информации што би можеле да помогнат во истрагата.
За среќа, пораката автоматски завршила во папката за несакана пошта и никогаш не стигнала до полициските истражители кои работат на нерасветлени убиства.
Од полицијата нагласуваат дека оваа околност не ја намалува сериозноста на случајот, бидејќи лажните информации можат да предизвикаат сериозни последици за вистинските истраги.
Тие потсетуваат дека зад секое нерасветлено убиство стојат жртви, семејства кои со години бараат одговори и истражители кои вложуваат напори да ја откријат вистината.
По откривањето на пропустот, „Антропик“ го прекинал автоматизираниот процес на тестирање што овозможил испраќање на лажната пријава и вовел дополнителни безбедносни проверки.
Претставници на компанијата се сретнале со полицијата на 8 октомври за да објаснат како дошло до инцидентот и кои мерки биле преземени.
Од полициската управа потврдиле дека нема индиции за неовластен пристап до нивните компјутерски системи или компромитирање на службени податоци.
Случајот повторно го отвора прашањето за безбедноста и контролата врз напредните системи со вештачка интелигенција, особено кога тие добиваат можност самостојно да комуницираат со интернет-страници и да испраќаат информации до институциите.
