Сè поголем број богати луѓе ширум светот вложуваат огромни суми во изградба на подземни бункери, стравувајќи од можни војни, глобални кризи, природни катастрофи и непредвидливите последици од развојот на вештачката интелигенција.
Она што некогаш се сметаше за подготовка за апокалипса, денес прераснува во сериозен бизнис, а компаниите специјализирани за изградба на приватни засолништа пријавуваат значителен раст на интересот, особено кај најбогатите клиенти.
Според пишувањето на „Њузвик“, побарувачката за вакви објекти значително се зголемила по пандемијата на коронавирусот, а дополнително ја поттикнале војната во Украина, конфликтите на Блискиот Исток и растечката загриженост за глобалната безбедност.
Претставниците на компаниите што градат бункери откриваат дека нивните клиенти повеќе не се плашат исклучиво од нуклеарна војна. Меѓу главните причини за инвестирање во подземни засолништа се можните сајбер-напади, прекини во снабдувањето со електрична енергија, нови пандемии, граѓански немири и потенцијалните ризици поврзани со вештачката интелигенција.
Наоми Корби од компанијата SAFE објаснува дека богатите клиенти најчесто наведуваат повеќе различни сценарија од кои сакаат да се заштитат. Според неа, вештачката интелигенција станува сè почеста тема во разговорите, особено поради можноста дополнително да ги усложни постојните безбедносни закани.
Подземни луксузни градови со базени, кина и сопствени извори на енергија
Современите бункери за најбогатите веќе не се обични бетонски простории со резерви од храна и вода. Некои од нив претставуваат вистински подземни луксузни комплекси, опремени со приватни апартмани, теретани, кино-сали, базени, медицински простории и независни системи за електрична енергија и прочистување на воздухот.
Компанијата Vivos, на пример, развива објекти наменети за долготраен престој под земја. Нејзиниот комплекс Europa One во Европа се наоѓа во поранешен воен објект од времето на Студената војна, со километри подземни тунели и можност за уредување луксузни станбени простории.
Во американската сојузна држава Јужна Дакота, истата компанија располага со голема подземна заедница изградена на просторот на поранешна воена база. Таму се наоѓаат стотици бетонски засолништа, а поединечните единици имаат површина од околу 200 квадратни метри и можат да сместат десет или повеќе лица.
Колку е профитабилен овој бизнис покажуваат и информациите од компанијата Hardened Structures, чиј основач Брајан Камден изјавил дека моментално работат на проекти вредни приближно 100 милиони долари.
Дури и експертите за вештачка интелигенција размислуваат за бункери
Особено внимание предизвикале информациите дека и дел од водечките луѓе во технолошката индустрија размислувале за вакви засолништа.
Илја Суцкевер, коосновач на OpenAI и поранешен главен научник на компанијата, претходно разговарал за потребата од изградба на бункери во пресрет на развојот на општа вештачка интелигенција, позната како AGI.
Според наводите во книгата „Империја на вештачката интелигенција“ од новинарката Карен Хао, неговата загриженост била поврзана со можните општествени последици од создавањето исклучително напредна вештачка интелигенција.
Иако нема сигурни податоци колку вакви објекти се изградени во светот, компаниите од оваа индустрија тврдат дека интересот постојано расте.
За најбогатите, изградбата на бункер станува своевидно осигурување од непредвидлива иднина. Тие инвестираат милиони во простории што можеби никогаш нема да ги употребат, но кои би можеле да им обезбедат засолниште доколку дојде до сериозна глобална криза.
