Научниците дошле до изненадувачко откритие кое открива дека белите џуџиња, остатоци од ѕвезди што го завршиле својот животен циклус, можат да имаат многу повеќе бои отколку што досега се претпоставувало.
Според новото истражување, овие небесни тела можат да изгледаат розови, виолетови, жолти, сино-зелени, па дури и зелени.
Истражувањето го предводел Марк Холандс од Универзитетот во Ворик, кој објаснил дека бојата на ѕвездите најчесто зависи од нивната температура, но кај белите џуџиња важна улога има и хемискиот состав на атмосферата.
Најголемото изненадување било бело џуџе со температура од околу 4.000 степени Целзиусови, за кое научниците утврдиле дека може да има необична жолто-зелена боја, позната како „шартрез“.
Овој ефект се поврзува со присуството на елементи како калциум, литиум и натриум, кои можат да потекнуваат од карпести остатоци на древни планетарни системи.
Ѕвездите со поголемо количество јаглерод, пак, можат да изгледаат розови или виолетови, додека други, зависно од составот на атмосферата, добиваат жолти или сини нијанси.
Во истражувањето биле анализирани 151 бело џуџе на оддалеченост до приближно 65 светлосни години од Земјата.
Од нив, пет имале необични бои – две жолти и три розови.
Иако повеќето бели џуџиња и понатаму изгледаат бели, новите сознанија покажуваат дека нивната атмосфера може значително да влијае врз изгледот.
Откритието отвора нови можности за проучување на хемискиот состав и еволуцијата на ѕвездите во последната фаза од нивниот живот.
