Во ледените води на Антарктикот се појавува еден од најнеобичните природни феномени на планетата, познат како „прст на смртта“, кој изгледа како огромен леден сталактит што се спушта кон морското дно.
Феноменот, научно познат како „брајникл“ (brinicle), може да замрзне морски организми кои ќе се најдат на неговиот пат.
Оваа необична ледена формација настанува кога морската вода се замрзнува на површината, при што солта се истиснува од мразот и создава исклучително студена и концентрирана солена вода.
Бидејќи е погуста од околната вода, таа почнува да тоне кон морското дно. При спуштањето, околната вода замрзнува и постепено создава шуплива ледена цевка која продолжува да расте надолу.
Ваквите ледени формации можат да достигнат пречник од околу 25 сантиметри и да растат по неколку метри дневно.
Кога „прстот на смртта“ ќе стигне до морското дно, мразот може да почне да се шири по неговата површина.
Токму тогаш настанува опасност за бавните морски организми, како морските ѕвезди и морските ежови, кои не можат доволно брзо да се оддалечат.
Мразот може целосно да ги зароби и замрзне на местото каде што се наоѓаат.
Овој феномен првпат бил забележан во 1960-тите години, но научниците успеале да го снимат дури во 2011 година.
Иако изгледа како сцена од научнофантастичен филм, „прстот на смртта“ е природен процес кој покажува колку необични и сурови можат да бидат условите во поларните мориња.
Видео:
