Глечерот Твејтс на Западен Антарктик, познат како „Глечерот на судниот ден“, се топи поинтензивно отколку што научниците претходно предвидувале, покажува ново истражување објавено во научното списание „Nature Communications“.
Според научниците, неговото влијание врз глобалното покачување на нивото на морето би можело да биде двојно поголемо од претходните проценки.
Глечерот, чија површина е приближно колку американската сојузна држава Флорида, веќе со децении се повлекува.
Во случај на целосно топење, мразот од Твејтс би можел да го подигне глобалното ниво на морето за повеќе од 60 сантиметри.
Дополнително, неговото повлекување би можело да ја дестабилизира пошироката ледена покривка на Западен Антарктик, што претставува уште поголема долгорочна опасност.
Истражувачите од Универзитетот во Калифорнија и лабораторијата на НАСА откриле дека релативно топлата океанска вода навлегува под глечерот преку процес поврзан со плимата и осеката, предизвикувајќи дополнително топење.
Со вклучување на овој процес во компјутерските модели, научниците пресметале дека Твејтс би можел да придонесе за покачување на морското ниво за околу 3,05 сантиметри до 2100 година.
Истражувањето проценува и дека постои околу 60 проценти веројатност мразот да изгуби една од важните потпорни точки до крајот на векот.
Научниците предупредуваат дека дури и неколку дополнителни сантиметри можат значително да го зголемат ризикот од поплави во крајбрежните области.
Сепак, нагласуваат дека се потребни дополнителни мерења за попрецизно предвидување на идното повлекување на глечерот.
За 2028 година се планирани нови теренски истражувања, кои треба да откријат што точно се случува под огромната ледена маса.
