Американскиот претседател Доналд Трамп се соочува со нов притисок од Конгресот, откако 22 членови на Претставничкиот дом побараа итна примена на санкциите против Русија, пред истекот на законскиот рок на 18 октомври.
Во писмо испратено до американскиот претседател, конгресмените од двете партии бараат целосно спроведување на мерките предвидени со законот за санкции против Русија и Иран од 2026 година.
Тие сметаат дека економскиот притисок врз Москва е неопходен за да се поттикнат сериозни мировни преговори за Украина.
Особена загриженост изразиле поради одлуката на американското Министерство за финансии од 9 октомври, со која биле дозволени одредени трансакции поврзани со увозот на руски дизел во САД.
Конгресмените бараат итно укинување на оваа дозвола, предупредувајќи дека приходите од руската енергија би можеле да придонесат за финансирање на војната.
Во писмото поставиле и пет конкретни прашања, барајќи од администрацијата писмени одговори најдоцна до 18 октомври.
Меѓу другото, побарале информации за списокот на руски функционери, банки и компании што ќе бидат опфатени со санкциите, како и за можните дополнителни царини за земјите што купуваат руска енергија.
Конгресмените бараат објаснување и дали Белата куќа планира да одложи дел од мерките или да одобри нови исклучоци.
Писмото го потпишале претставници на Републиканската и Демократската партија, што покажува дека барањето за построги санкции има поддршка од двете политички страни.
Клучниот датум е 18 октомври, кога истекува првиот законски рок за примена на предвидените мерки. Дотогаш останува да се види како ќе одговори администрацијата на Трамп.
