Американската технолошка компанија Гугл по првпат по речиси десет години го ажурираше своето препознатливо лого. Новото „G“ задржува четири бои, но сега тие се спојуваат со мазни премини – црвената преминува во жолта, жолтата во зелена, а зелената во сина, наместо да бидат остро раздвоени како досега.
Ова е прва визуелна промена на логото од септември 2015 година, кога малото „g“ беше заменето со голема буква „G“. Засега, новиот дизајн е забележан само на уредите Pixel од самиот Гугл, како и на iPhone телефони кои го користат iOS оперативниот систем, пренесува порталот The Verge.
Сепак, старата верзија на логото – со јасно разграничени бои – сè уште се користи на веб и на Android уредите, наведуваат технолошки извори.
Оваа промена доаѓа во момент кога позицијата на Гугл на пазарот е благо нарушена, откако Apple објави дека планира да воведе алтернативи базирани на вештачка интелигенција во својот пребарувач Safari. Меѓу најавените опции се Perplexity и ChatGPT, како можни замени за досега доминантниот Google Chrome.
Веста предизвика значајна реакција на финансиските пазари – акциите на Alphabet, матичната компанија на Гугл, паднаа за 7,3 проценти, што резултираше со губиток од приближно 150 милијарди долари во пазарната вредност на компанијата.
