Европската Унија официјално ја донесе одлуката што ќе го промени начинот на кој ги користиме нашите уреди – до 2028 година сите електронски уреди ќе мора да имаат USB-C полнач, без исклучок. Ова значи дека телефонот, лаптопот, таблетот, па дури и рутерите, ќе се полнат со еден ист кабел.
Новите правила предвидуваат и единствено лого на ЕУ кое ќе го носат сите уреди што ги исполнуваат условите – така потрошувачите лесно ќе знаат кои производи се компатибилни.
Според Европската комисија, овој потег ќе донесе огромни заштеди – до 100 милиони евра годишно, бидејќи корисниците повеќе нема да купуваат различни полначи. Дополнително, ќе се намали електронскиот отпад, ќе се заштеди енергија и ќе се намалат емисиите на штетни гасови.
Комесарот за енергетика, Ден Јоргенсен, ја нарече оваа одлука „паметен потег што ги става граѓаните на прво место“ и додаде дека ЕУ повторно докажува дека иновацијата може да оди рака под рака со одржливоста.
Накратко – заборавете на купишта кабли. До 2028 година, еден полнач ќе владее со сите!
