Русија успешно го заврши развојот на својата вакцина против рак, која сега е подготвена за клиничка употреба по добивањето на лиценца. Според Вероника Скворцова, раководителка на Федералната медицинска биолошка агенција (ФМБА), претклиничките испитувања покажале дека вакцината е безбедна за повеќекратна употреба, ја намалува големината на туморите, забавува нивниот раст и го продолжува преживувањето на пациентите.
Првата примена ќе биде кај пациенти со колоректален карцином, додека во последната фаза од развој се вакцини за глиобластом – малигнен мозочен тумор, и за одредени видови меланом, вклучувајќи и очни мембрани. Скворцова потсети дека оваа иницијатива била најавена уште во ноември 2024 година и дека целта е персонализиран третман за пациентите, со надеж дека вакцината ќе донесе значителен напредок во лекувањето на овие тешки болести.
