Уште еден голем успех за велешката музичка сцена. Детскиот хор „Св. Кирил и Методиј“ од Велес, под диригентската палка на Веселинка Маџарова, повторно се закити со златен медал и го освои првото место на интернационалниот натпревар „Music and See“ во Паралија, Грција.
Натпреварот важи за еден од најпредизвикувачките, со голема и силна меѓународна конкуренција, а велешкиот хор успеа да се издвои со својот настап и да добие највисока оценка.
Особено признание доби и диригентката Веселинка Маџарова, која беше пофалена за изборот на композициите и за подготовката на хорот.
Освојувањето на златниот медал и првото место претставува уште една потврда за посветеноста, талентот и континуираната работа на младите хористи и нивната диригентка.
Со овој успех, Детскиот хор „Св. Кирил и Методиј“ уште еднаш достојно го претстави Велес на меѓународната музичка сцена и се враќа дома со највисокото признание од натпреварот.
