Пожарот во прилепскиот дел на Мариово повторно се разгоре попладнево поради силниот ветер, откако синоќа огнената стихија зафати делови од селото Чаниште.
Според информациите од директорот на Дирекцијата за заштита и спасување, Стојанче Ангелов, огнената линија во моментов е долга околу 20 километри, протегајќи се од течението на Црна Река до врвот Маргаро.
На терен се пожарникарите од Прилеп, како и тимови на ДЗС составени од доброволци од Битола. Дополнително се вклучени и доброволци од Кочани и Виница.
Најголем приоритет во текот на ноќта ќе биде заштитата на селото Крушевица, кое се наоѓа на само неколку километри од пожарот.
Во гаснењето во текот на денот биле вклучени и „ер тракторите“ на ДЗС. Со нивната интервенција бил прекинат дел од огнената линија и била намалена опасноста за блискиот манастир и населеното место.
Сепак, состојбата на теренот останува сложена. Високата и сува трева овозможува огнот брзо да се шири, додека силниот ветер дополнително ја отежнува борбата на екипите со пламените јазици.
Екипите остануваат на терен, а во текот на ноќта напорите ќе бидат насочени кон спречување на пожарот да се доближи до Крушевица.
Видео:
