Драма се случи на скопскиот аеродром рано утрово, кога авион на авиокомпанијата „Виз ер“ кој требаше да лета од Крит за Белград, ненадејно заврши во Скопје околу 4 часот. Летот бил закажан за 15 минути по полноќ, но првично бил пријавен како празен, што ги изненадило и полицијата и вработените на аеродромот.
Патниците, околу 200 лица, не добиле претходна информација за пренасочувањето. Според изјави на патници, првично добивале СМС-пораки за одложување, а потоа, околу 4:20 часот, авионот полетал кон Скопје. По слетувањето, патниците биле задржани во авионот подолго време и не им било дозволено да излезат сè додека една жена не почувствувала здравствени проблеми. На крајот, тие останале на празен аеродром се додека не им бил обезбеден автобус за Белград.
Пилотот објаснил дека неговото работно време завршило и дека повеќе информации ќе добијат на аеродромот, но и таму вработените биле збунети бидејќи летот првично бил пријавен како празен. Патниците се обраќале и до Амбасадата на Србија, но добиле одговор дека не може да се интервенционира затоа што аеродромот во Белград не работи и не прима авиони.
Според официјалните информации, веб-страницата на белградскиот аеродром го прикажува летот како откажан, додека на македонскиот аеродром е евидентиран како реализиран, но со задоцнување од повеќе од три часа. На сервисот FlightRadar се гледа дека авионот слетал во Скопје наместо во Белград, без официјално образложение за причините за пренасочувањето.
