Девет полицајци се хоспитализирани на токсикологија поради вдишување чад при гаснењето на пожарот што избувна кај СЦ Борис Трајковски во Скопје.
Пожарот се случи на 30.08.2025 околу 16:00 часот, а полициските екипи, заедно со противпожарните служби, веднаш интервенираа за да се спречи ширење на огнот кон моторни возила, објекти и лизгалиштето во состав на спортскиот центар.
Во текот на интервенцијата, безбедно беа евакуирани учесниците на меѓународниот ракометен турнир, како и сите други спортски работници и публика.
Како последица на вдишувањето чад, девет полицајци добија кислородна поддршка на Одделот за токсикологија. Според МВР, нивната состојба е стабилна, а службите продолжуваат да ја следат ситуацијата на терен.
