Полицијата приведе 32-годишен жител на Кавадарци кој е осомничен дека измамил 50-годишна жена од Куманово, земајќи ѝ вкупно 9.000 евра под изговор дека ќе посредува за добивање странски пасош.
Според информациите од Министерството за внатрешни работи, М.Д. бил лишен од слобода на 23 јули околу 13:50 часот на Градскиот плоштад во Кавадарци, по претходна пријава поднесена од оштетената.
Истрагата покажала дека осомничениот најпрво побарал 400 евра, уверувајќи ја жената дека ќе ѝ помогне во постапката за обезбедување странски пасош. По првата уплата, тој во повеќе наврати продолжил да бара дополнителни суми, убедувајќи ја дека се потребни нови трошоци, при што таа му предала вкупно 9.000 евра.
И покрај веќе добиените пари, осомничениот не престанал со барањата и продолжил да бара нови парични средства.
При полициската акција, кај него биле пронајдени 2.000 евра кои непосредно претходно ги зел од оштетената. Парите биле претходно криминалистичко-технички обработени од полициските службеници, што овозможило нивно идентификување како доказ во постапката.
По приведувањето, осомничениот бил задржан во полициска станица, а потоа изведен пред јавен обвинител, каде што, според МВР, го признал делото.
По целосното документирање на случајот, против него ќе биде поднесена соодветна кривична пријава за кривичното дело измама.
