На скопската Клиника за Онкологија продолжува хаосот кој секојдневно ги тера пациентите болни од рак да поминуваат часови во неизвесност и маки, пишува „Фокус“.
Големите редици започнуваат уште пред влезот во клиниката, а внатре ситуацијата е уште поалармантна – преполни ходници, метеж пред шалтерите и хаос кај дневната болница. Пациентите, од кои многумина патуваат километри за да дојдат до Скопје, чекаат со часови за да влезат на терапија.
Она што дополнително ја влошува состојбата е недостатокот на простор во дневната болница – болните немаат каде да седнат додека примаат лекови кои им значат живот. Мнозина, изнемоштени и во тешка состојба, се потпираат на своите најблиски кои ги придружуваат.
„Секој пат кога доаѓаме е исто. Јас еднаш неделно ја носам од Тетово мајката на сопругата, која боледува од рак на дебело црево. Откако ќе земе бројче, минуваат часови додека да дојде на ред за терапија, а во дневната болница нема каде да седнат пациентите. Разбирам за нас, ќе почекаме надвор, но на некои од овие луѓе ова им се последните месеци од животот – зарем треба да ги минат по болнички ходници?“, вели еден од придружниците за „Фокус“.
Иако проблемот е одамна познат, состојбата никако да се среди, а пациентите и натаму се соочуваат со борба која изгледа подеднакво тешка како и самата болест.
