Утрешниот ден го носи едно од најзначајните духовни обележја во православието – Пречиста, или Воведение на Пресвета Богородица во храмот, празник кој спаѓа меѓу дванаесетте најголеми во црковната година. Особено почитуван кај жените, мајките и младите семејства, овој ден носи силна порака за чистота, посветеност и за благословот што доаѓа преку вистинското воспитување на децата.
Според старото црковно предание, праведните Јоаким и Ана – долго молејќи се за рожба – му ветиле на Бога дека ако им подари дете, ќе му го посветат на служба. Кога малата Марија наполнила три години, тие го исполниле ветувањето: тргнале со свечена поворка од Назарет кон Ерусалим, предводена од девојчиња облечени во бело, а според преданието, во чекорот им се придружувале и ангели.
На самиот влез од храмот, првосвештеникот Захарие ја пречекал Марија и, на изненадување на сите присутни, ја внел во најсветиот дел од светињата. Токму овој возвишен чин го поставува темелот на денешниот празник – спомен на воведувањето на Пресветата Богородица во Божјиот храм.
Но Пречиста не е само спомен на историски настан. Тоа е празник што и денес ја носи истата силна порака: дека воспитувањето започнува од домот, дека родителите се првите учители на верата, моралот и љубовта, и дека духовната цврстина на децата е најголемиот дар што мајките и татковците можат да им го дадат во време исполнето со предизвици.
Празник исполнет со чистота, благослов и почит – ден посветен на женската сила, мајчинството и светлината што тие ја внесуваат во секое семејство.
