Царинската управа спречи голем обид за шверц на цигари, при што биле откриени 104 пакети со вкупно 5.200 штеки цигари. Акцијата ја спровеле инспекторите од Секторот за контрола и истраги.
Камионот, кој на излез од државата на граничниот премин Ново Село бил пријавен како „празен“, бил селектиран за детален преглед. При контролата, инспекторите од Одделението за оперативни работи – познати по високите откривачки капацитети – пронашле специјално конструиран таен бункер во предниот дел од ладилната полуприколка. Во него биле скриени цигарите.
Против возачот, државјанин на Србија, е поднесена кривична пријава, а инспекторите од Одделението за истраги преземаат понатамошни постапки.
Директорот на Царинската управа, Бобан Николовски, истакна дека борбата против царинските измами и шверцот на тутун и тутунски производи е еден од приоритетите нотирани и во извештајот на Европската комисија.
„Годинава, заклучно со 30 ноември, по основ на увоз на тутун и тутунски производи наплативме 15,3 милијарди денари, што е раст од 10 проценти во однос на минатата година,“ додаде Николовски.
