Голема акција за гаснење на пожарот во Општина Студеничани е во тек, а во интервенцијата се вклучени и три авиони на Дирекцијата за заштита и спасување, информираат од Центарот за управување со кризи.
Директорот на ЦУК е на терен заедно со екипите на Противпожарната бригада на Град Скопје, кои работат на локализирање на огнот и спречување на неговото понатамошно ширење.
Покрај интервенцијата од земја, пожарот се гасне и од воздух со трите авиони на ДЗС.
Од ЦУК информираат дека во моментов нема опасност за ниту едно населено место и дека состојбата внимателно се следи.
Надлежните служби ќе останат на терен во текот на целата ноќ, при што ќе продолжи координацијата на активностите и следењето на движењето на пожарот.
