На автопатот Скопје-Велес, кај клучката „Илинден“, вчера се случи тешка сообраќајна несреќа во која повредени се пет лица, меѓу кои и 19-годишен возач. Несреќата се случила околу 10:15 часот, кога патничко возило „фолксваген пасат“ со скопски регистарски ознаки, управувано од Л.А. (19) од Скопје, излетало од коловозот.
Во несреќата со тешки телесни повреди се здобил сопатникот С.А., додека возачот и останатите сопатници Ф.А., Е.А. и Н.А., сите од Скопје, се здобиле со телесни повреди. Тие биле пренесени и згрижени во Комплексот клиники „Мајка Тереза“ и Градската општа болница „Св. Наум Охридски“.
На местото на настанот веднаш интервенирала увидна екипа од СВР Скопје, а истрагата е во тек за утврдување на причините што довеле до несреќата. Градските власти апелираат до возачите да ја прилагодат брзината и внимателно да возат, особено на клучките и на автопатските делници со поголема фреквенција на сообраќај.
