Пет пациенти кои се лекуваат во странство остануваат во критична состојба, додека останатите 100 се стабилни. Според министерот за здравство Арбен Таравари, утре уште девет пациенти ќе бидат пуштени на домашна нега, а во среда и четврток се очекува враќање на првите пациенти од странство, за што е подготвен протокол за прием.
„Подготвивме специјални тимови и стерилизирани возила за нивниот транспорт. Клиниките во Скопје ќе вршат тријажа, а ќе се преземат сите мерки за спречување на инфекции“, изјави Таравари.
Во болниците низ земјава моментално се лекуваат 55 пациенти, од кои 27 во Клиничкиот центар, 10 во „8 Септември“, 10 во „Свети Наум Охридски“ и 8 во приватни клиники.
