Утрово Македонија се разбуди со невообичаено ниски температури за мај. Според податоците на УХМР, најстудено било во Берово и на Попова Шапка, каде во 7 часот биле измерени -4 степени Целзиусови.
Минусни температури се регистрирани и во Скопје-Петровец, Крива Паланка, Претор и Крушево, каде биле измерени -2 степени, додека -1 степен е забележан во Битола, Штип, Велес, Маврови Анови и Лазарополе.
Во Охрид, Кавадарци, Демир Капија и Струмица температурата изнесувала 0 степени, додека најтопло утрово било во Тетово со 5 степени.
Во текот на денот времето ќе биде променливо облачно, со повремени локални врнежи од дожд. Во југоисточните делови има услови за краткотраен пороен дожд и ретки грмежи. Ќе дува умерен до засилен северен ветер, а максималната температура ќе се движи од 13 до 20 степени.
Во Скопје се очекува променливо облачно време со сончеви периоди и можност за слаб локален дожд попладне.
