Случај што предизвика бурни реакции во Охрид деновиве е под истрага на полицијата, откако неколку родители пријавиле дека нивните малолетни деца биле физички нападнати и малтретирани по наводна кражба во локален маркет.
Според информациите од СВР Охрид, пријавата била поднесена на 9 мај 2026 година околу 23:00 часот. Тројца охриѓани на возраст од 45, 45 и 35 години пријавиле дека претходно истиот ден, околу 17:00 часот, нивните деца наводно одзеле чоколадно млеко од маркет во градот.
Но, според наводите во пријавата, инцидентот не завршил само со откривање на кражбата. Родителите тврдат дека сопственикот на маркетот, заедно со уште едно женско лице, физички ги нападнале и малтретирале децата.
Случајот предизвика внимание во јавноста, особено поради возраста на инволвираните деца и начинот на кој наводно било постапено со нив.
Од полицијата информираат дека веќе се преземаат мерки за целосно расчистување на случајот, а се работи и на утврдување на сите околности поврзани со инцидентот.
