Македонија ќе почне процес за изработка на Каталог на минерални суровини и мапа на геолошките истражувања, со цел попрецизно да се утврди со какви природни ресурси располага земјата и каков е нивниот економски потенцијал.
Иницијативата е дел од пошироката соработка меѓу Министерството за енергетика, рударство и минерални суровини и Универзитетот „Гоце Делчев“ во Штип. Во фокусот ќе бидат геолошките истражувања, критичните минерали, развојот на лабораториските капацитети и примената на современи технологии.
Министерката Сања Божиновска истакна дека минералниот потенцијал на Македонија мора научно да се истражи и одговорно да се стави во функција на економскиот развој.
„Не можеме да зборуваме за современо рударство без наука, технологија и силни институции. Затоа го поврзуваме Министерството со универзитетите и создаваме услови знаењето да стане двигател на развојот“, порача Божиновска.
Ректорот на УГД, проф. д-р Дејан Мираковски, посочи дека Универзитетот располага со значајни научни и лабораториски капацитети кои можат да бидат ставени во функција на државата, индустријата и граѓаните.
Се разговарало и за заедничко аплицирање за средства од европските фондови за проекти поврзани со научни истражувања, нови технологии, заштита на животната средина, зелена транзиција и одржливо користење на природните ресурси.
Посебно внимание ќе му биде посветено и на македонскиот рубин. Идејата е УГД да се вклучи во неговото истражување, заштита и промоција, со што овој минерал би можел дополнително да се афирмира како дел од природното и геолошкото наследство на Македонија.
Според Божиновска, критичните минерали имаат сè поголемо значење за современата индустрија, енергетиката и зелената транзиција, поради што инвестициите во истражувања, лаборатории, стручен кадар и технологии се важни за долгорочната економска и ресурсна сигурност на државата.
