Во рамки на одбележувањето на „Розовиот октомври“ – месецот за подигање на свеста за ракот на дојка, во Кавадарци се одржа едукативна „Розева панел дискусија“, со посебен фокус на младите девојки и средношколките.
Настанот го отворија градоначалникот Митко Јанчев и претседателот на Советот на Општина Кавадарци, д-р Стојанчо Рамов, кои во своите обраќања ја потенцираа клучната улога на превенцијата, навремената едукација и грижата за здравјето уште од најрана возраст.
Свои стручни излагања имаа четири панелистки од различни области:
- Д-р Гордана Ѓорчева Камчева (специјалист радиолог)
- Д-р Цветанка Гинева Ристовска (гинеколог)
- Д-р Весна Ризова (психијатар)
- Моника Димовска (фитнес инструктор)
Презентациите и дискусијата опфатија важни теми – од превентивни прегледи, репродуктивно и ментално здравје, па сè до физичката активност и изградбата на здрави навики. Ученичките имаа можност директно да поставуваат прашања, кршејќи ги табуата и стереотипите кои често ја следат оваа тема, бидејќи информираноста е првиот и најважен чекор кон здравјето.
