Министерот за здравство, Клековски, денеска се обрати на отворањето на 12. Турски медицински светски конгрес во Истанбул, кој се одржува во организација на Министерството за здравство на Република Турција и Институтот за здравство на Турција, а под покровителство на претседателот на државата. Овогодинешната централна тема на конгресот е „Иновативно здравство: отпорни здравствени системи, наспроти глобалните здравствени закани“.
Во своето обраќање, министерот Клековски му го честиташе на турскиот народ празникот – 103 години од прогласувањето на Република Турција, посакувајќи мир и благосостојба.
— Глобалните здравствени предизвици бараат заеднички одговори. Затоа, Македонија останува отворена за соработка со сите партнери кои ја споделуваат визијата за модерни, иновативни и отпорни здравствени системи, истакна Клековски.
Тој нагласи дека дигиталната трансформација на здравството претставува еден од клучните приоритети на Министерството, поле на кое Турција има значајно искуство и успешни практики.
Во рамки на работната посета на Истанбул, министерот Клековски ќе оствари повеќе билатерални средби, меѓу кои и официјална средба со министерот за здравство на Република Турција, проф. д-р Кемал Мемишоглу.
