Основното јавно обвинителство Тетово отвори постапка против 49-годишен тетовец, кој е осомничен дека сторил кривично дело „Загрозување на сигурноста“ според член 144 став 5 од Кривичниот законик.
Осомничениот, на 28 октомври, преку свој профил на Фејсбук, објавил видео и текст на албански јазик во кои се заканувал со убиство и други тешки кривични дела кон една жена, како и кон функционери на политичка партија и лица со политичко уверување. Објавата имала навредлива, омаловажувачка и заканувачка содржина, предизвикувајќи кај оштетените чувство на вознемиреност и страв, соопшти Јавното обвинителство.
Судијата на претходна постапка од Основниот суд во Тетово ја прифатил иницијативата на јавниот обвинител и му одредил притвор на осомничениот, со цел да се обезбеди безбедноста на оштетените и да се овозможи несметано водење на кривичната постапка.
Оваа постапка е дел од континуираните активности на правосудните органи против заканите и насилните објави на социјалните мрежи, со цел заштита на граѓаните и политичките актери.
