Агенција за безбедност на сообраќајот упати апел до сите учесници во сообраќајот да бидат особено внимателни за време на претстојните првомајски празници, кога се очекуваат зголемени гужви, подолги патувања и поголем ризик од сообраќајни несреќи.
Од агенцијата предупредуваат дека токму во вакви периоди, кога атмосферата е порелаксирана и сообраќајот поинтензивен, најчесто доаѓа до критични грешки зад воланот. Меѓу нив се издвојуваат три најризични одлуки: возење под дејство на алкохол, преголема брзина и користење мобилен телефон додека се вози.
Првото јасно „НЕ“ се однесува на алкохолот, бидејќи и мали количини можат да ја нарушат проценката и реакцијата на возачот. Статистиките покажуваат дека значителен број сообраќајни жртви се поврзани токму со возење под дејство на алкохол.
Второто „НЕ“ е за неприлагодена брзина, која значително го намалува времето за реакција и ја зголемува тежината на последиците во случај на незгода. Дополнително, заморот и пребрзото возење се исто така меѓу честите фактори кај сериозните несреќи.
Третото „НЕ“ се однесува на користење мобилен телефон за време на возење, бидејќи неколку секунди невнимание значат движење без контрола на возилото и поминување десетици метри „на слепо“.
Од Агенција за безбедност на сообраќајот порачуваат дека во сообраќајот нема простор за опуштање и дека безбедноста зависи од одговорното однесување на секој учесник, како и од почитување на правилата и меѓусебно внимание.
Граѓаните се повикуваат да патуваат внимателно, да планираат однапред и да придонесат за побезбедни патишта за време на празниците.
