Претседателот на САД, Доналд Трамп, им соопштил на своите соработници дека треба да се подготват за продолжена блокада на Иран, објави „Волстрит журнал“ (WSJ), повикувајќи се на американски официјални лица.
Според извештајот, Трамп на неодамнешни состаноци одлучил да продолжи со економски притисок врз Иран, со фокус на ограничување на извозот на нафта и спречување на бродскиот сообраќај кон и од иранските пристаништа. Тој, наводно, смета дека и другите опции – продолжување на бомбардирањата или повлекување од конфликтот – носат поголем ризик отколку стратегијата на блокада.
Агенцијата Ројтерс не можела веднаш да ги потврди овие информации.
Во меѓувреме, се наведува дека Иран доставил предлог до САД за повторно отворање на Ормускиот теснец и деескалација на конфликтот, но тој план не наишол на одобрување од Трамп.
Тој на својата социјална мрежа „Truth Social“ напиша дека Иран е во „состојба на колапс“ и дека бара итно отворање на Ормускиот теснец додека се обидува да ја стабилизира својата внатрешна ситуација.
Изјавите на Трамп предизвикуваат сè повеќе критики во меѓународната јавност. Германскиот канцелар Фридрих Мерц оцени дека Иран ја „понижил“ американската администрација, сугерирајќи дека Техеран има предност во преговорите.
Според најновите анкети, поддршката за американскиот претседател опаѓа поради незадоволството на граѓаните од економските услови и од ескалацијата на конфликтот со Иран.
Во исто време, цените на горивата во САД растат поради стравувањата од долготрајна енергетска криза, додека Вашингтон и Техеран остануваат во ќорсокак околу клучните прашања – отворањето на Ормускиот теснец и иднината на иранската нуклеарна програма.
Иранските власти предложиле повеќефазен план: прво отворање на Ормускиот теснец, потоа укинување на блокадите и на крај преговори за нуклеарната програма. Сепак, САД засега не го прифаќаат овој предлог.
