Метеоролошките најави предупредуваат на краткотраен, но изразен студен бран кој кон крајот на април ќе донесе значително заладување и температури далеку под вообичаените вредности за овој период од годината.
Според анализите на метеоролошката служба Severe Weather Europe, продорот на арктички воздух кон Источна и Југоисточна Европа е резултат на нарушена циркулација во атмосферата, вклучително и ослабен поларен вител и формирање на блокирачки систем над Северниот Атлантик и Гренланд.
Овој т.н. „Омега блок“ спречува нормален проток на воздух и овозможува студената воздушна маса од север да се спушти кон југ, носејќи температури кои се и до 10–15 степени под просекот за крајот на април.
Најизразено заладување се очекува во делови од Источна Европа, каде веќе се регистрираат значително пониски температури од вообичаените, а во некои региони се најавуваат и утрински мразови. Посебно погодени би можеле да бидат земјоделските површини во фаза на цветање.
Стручњаците предупредуваат дека најголем ризик има за лозарството и овоштарството, бидејќи претходните високи температури во април ја забрзале вегетацијата, па сега растенијата се во чувствителна фаза и поранливи на нагло заладување.
Студениот бран постепено ќе се прошири и кон Балканот, но се очекува да биде краткотраен. Иако температурите ќе се намалат, прогнозите засега не укажуваат на екстремни падови како во северните и источните делови на Европа, каде што се можни и снежни врнежи.
Метеоролозите посочуваат дека ваквите „топло-ладни“ контрасти низ Европа се резултат на нестабилна атмосферска циркулација, при што западниот дел од континентот останува под потопол воздух, додека истокот е изложен на арктички продори.
Земјоделците се советуваат внимателно да ја следат прогнозата во наредните денови, бидејќи краткотрајните пролетни мразови можат да предизвикаат сериозни штети, особено кај рано процветаните култури.
