Резултатите од локалните избори одржани завчера откриваат загрижувачка состојба на демократската партиципација – рекордно ниска излезност и висок број на неважечки ливчиња, што отвора сериозни прашања за легитимноста и довербата во изборниот процес.
Според податоците на Државната изборна комисија (ДИК), одѕивотот на овие локални избори 2025 година е само 48,29%, што е најниско ниво во историјата на независна Македонија за прв круг на локални избори. Од 3.474 избирачки места, обработени се 3.472, што го прави оваа бројка речиси конечна.
За споредба, на локалните избори:
- во 2013 година излезноста била 67%
- во 2017 – 60%
- во 2021 – 50,57%
Овој континуиран пад на одѕивот покажува загриженост во однос на ангажманот на граѓаните во политичкиот процес.
Бројот на неважечки ливчиња оваа година достигна рекордни 53.713, што претставува 6,1% од вкупно 884.851 гласачи кои излегле на гласање.
Само во Град Скопје, евидентирани се 12.270 неважечки ливчиња.
Историски споредби покажуваат тренд на раст:
- 2017: 11.472 неважечки за градоначалници, 13.367 за советнички листи
- 2021: 37.859 неважечки ливчиња
- 2025: 53.713 неважечки
Овие бројки отвораат дилеми – дали станува збор за недоволна изборна едукација, технички пропусти или намерен, тивок протест од страна на гласачите?
Организацијата Цивил веќе алармираше дека повторувањето на овој феномен покажува дека се потребни итни и суштински промени во начинот на кој се информираат гласачите и во кој се организираат изборите во целина.
Во контекст на најниска излезност и најголем број неважечки ливчиња досега, овие избори ќе останат запаметени не само по резултатите, туку и по пораките кои граѓаните, можеби тивко, ги испратија преку празните или неправилно пополнети ливчиња.
