Отечените нозе најчесто ги поврзуваме со замор, долго седење или физички напор, но во одредени случаи тие можат да бидат и знак за проблеми со срцето.
Лекарите предупредуваат дека отокот, медицински познат како едем, може да се појави кога во ткивата се задржува течност. Ако срцето не ја пумпа крвта доволно ефикасно, може да дојде до натрупување течности, вклучително и во нозете.
Истражување спроведено меѓу 500 возрасни лица во Велика Британија покажало дека помалку од половина од испитаниците знаеле дека отокот на нозете може да биде поврзан со срцеви заболувања.
Меѓу другите симптоми на кои треба да се обрне внимание се болка или притисок во градите, отежнато дишење, необично силен замор и неправилен срцев ритам.
Сепак, отечените нозе не значат автоматски дека постои срцево заболување и можат да имаат многу други причини.
Особено внимание е потребно доколку отокот е чест, необјаснет или се појавува заедно со други симптоми. При силна или ненадејна болка во градите и отежнато дишење треба веднаш да се побара медицинска помош.
