По 25 години пауза, Македонија повторно ќе добие средно полициско училиште кое ќе започне со работа од септември 2026 година. Министерот за внатрешни работи, Панче Тошковски, ја најави оваа голема реформа и истакна дека сите ученици кои ќе го завршат образованието во ова училиште ќе имаат загарантирано вработување во Министерството за внатрешни работи.
„Секој кој ќе се запише и успешно ќе дипломира во рамките на средното полициско училиште ќе стане дел од структурите на МВР. Тоа значи сигурна работа за сите идни дипломци“, рече Тошковски.
За почеток, ќе се овозможи интегрирање на ученици кои веќе ја завршиле втората година во други средни училишта, а тие ќе продолжат со школување во третата и четвртата година во полициското училиште.
Според нацрт-законот, новото училиште нема да предизвика дополнителни трошоци за државниот буџет, бидејќи ќе функционира во рамки на МВР, кое ќе биде одговорно за целокупниот образовен процес. Наставните програми ќе ги утврдува министерот за образование во координација со министерот за внатрешни работи, а со претходно позитивно мислење од Бирото за развој на образованието и Центарот за стручно образование.
Оваа одлука се смета за историски чекор со кој се отвора нова перспектива за младите, а во исто време се зајакнуваат институциите на државата со свеж кадар.
