За прв пат во историјата на Македонија, за проблемите со онколошките заболувања се дискутираше на највисоко државно ниво. Во Владата на заедничка маса седнаа претставници од Министерството за здравство, надлежните институции, лекарите, здруженијата на пациенти и врвни експерти од Франција, Словенија, Хрватска, Бугарија, Црна Гора и Босна и Херцеговина.
Поводот за овој состанок се загрижувачките статистички податоци – секој ден во Македонија дури 23 лица дознаваат дека боледуваат од рак.
Состојбата во здравствениот систем е алармантна: целата држава се потпира на само еден преоптоварен онколошки центар, превентивниот скрининг не стигнува до доволен број граѓани, а пациентите губат драгоцени недели во чекање на дијагноза и соодветна терапија.
Решенија и искуства од регионот и Европа
На состанокот не беа дебатирани само проблемите, туку беа претставени и европските практики кои веќе даваат резултати. Експертите ги посочија клучните столбови на успешен онколошки систем:
- Национална онколошка мрежа со единствени и заеднички стандарди;
- Организиран и задолжителен скрининг за сите ризични групи;
- Специјализирани конзилиуми за секој еден пациент;
- Строго дефинирани и јасни рокови за чекање на дијагноза и терапија.
Итни и одлучни чекори за спасување животи
За надминување на кризата се најавени итни чекори во неколку клучни сегменти:
- Превенција: Засилена борба против ризиците (како забрана на пушење на јавни места и проширување на ХПВ вакцинацијата).
- Фокусиран скрининг: Мобилизација на сите расположливи ресурси.
- Современа дијагностика: Подобрување на радиодијагностиката и изработка на студија за инфраструктурата и технологијата за радиотерапија.
- Стратешки пристап: Изработка на долгорочен Национален план за борба против ракот.
Упатена беше искрена благодарност до организацијата ХЕМАОНКО, до сите говорници и до учесниците кои дадоа придонес во оваа важна иницијатива, со единствена порака: „Пациентот со рак не смее и не може да чека!“
