Полицијата во изминатото деноноќие привела 11 возачи на различни локации низ Македонија поради сомнение за сторено кривично дело „безобѕирно управување возило“, предвидено во член 297-а од Кривичниот законик, информира Министерството за внатрешни работи.
Меѓу приведените има лица кои управувале возила без положен возачки испит, возачи под дејство на алкохол, лица кои не ја почитувале изречената забрана за управување, како и странски државјанин кој возел со брзина над дозволената.
Според информациите од МВР, пет лица управувале возила без да имаат положен возачки испит. Станува збор за 23-годишната А.Џ., Е.З. (26), Б.Д. (51) и 16-годишник, сите од Скопје, како и 14-годишник од скопското село Добрино.
Полицијата привела и двајца возачи кои управувале под дејство на алкохол. Станува збор за М.С. (42) од селото Уларци, во Општина Чешиново – Облешево, и Д.Е. (64) од Неготино. Според МВР, возачот од Неготино предизвикал и сообраќајна незгода во која била причинета материјална штета.
Дополнително, тројца возачи биле затекнати како управуваат возила и покрај тоа што имале активна мерка забрана за управување. Приведени се А.С. (36) од Битола, Р.Р. (26) од кичевско и М.Д. (21) од Кавадарци. За последниот било утврдено и дека управувал под дејство на алкохол.
Меѓу приведените е и М.Н. (34), државјанин на Црна Гора, кој управувал патничко возило со брзина поголема од дозволената.
Од Министерството за внатрешни работи информираат дека по целосното документирање на сите случаи ќе бидат поднесени соодветни кривични пријави.
Од МВР упатуваат апел до сите учесници во сообраќајот да ги почитуваат правилата и прописите, да не седнуваат зад волан без положен возачки испит, да не управуваат возило доколку имаат активна забрана и никогаш да не возат под дејство на алкохол.
Надлежните нагласуваат дека почитувањето на сообраќајните правила е одговорност на сите и е неопходно за поголема безбедност на патиштата низ државата.
