Невремето во Охрид откорна огромно десетметарско дрво кое заврши врз паркиран автомобил во населбата Даљан, целосно оштетувајќи го возилото. Инцидентот се случил во пешачка зона во време кога по улицата обично има голема раздвиженост – жителите велат дека за малку можело да има и човечки жртви.
Станарите веднаш повикале пожарникари, но службата се прогласила за ненадлежна. Потоа биле повикани претставници од Општина Охрид и ЈП „Охридски комуналец“, кои по увидот си заминале без конкретна одлука – иако, како што тврдат жителите, боровите на оваа локација уште пред години биле обележани како опасни.
Дрвото пет дена лежи на земја, а жителите посочуваат дека се наоѓа на државно земјиште и бараат Општината итно да реагира.
Но од „Охридски комуналец“ имаат поинаков став: тие велат дека обврската е на станарите, повикувајќи се на одлука од 2023 година според која Заедницата на сопственици на зградата на ул. Сатеска требало да ги уреди крошните на дрвјата – нешто што никогаш не било направено.
Од претпријатието додаваат дека дрвото ќе биде отстрането, но станарите треба да платат 18.800 денари – сума што веќе им била доставена преку управителот на зградата.
Жителите револтирано прашуваат: „Како можемо да плаќаме за дрво што паѓа на државно земјиште?“
Ситуацијата останува нерешена, а дрвото сè уште го блокира просторот – сведоштво за административниот хаос кој ги остава граѓаните да се снаоѓаат сами.
